ஒரு ஞானாசிரியரின்‌ (குரு) இயல்புகள்‌ எப்படி இருக்கும்‌ என்பதை சுட்டிக்‌ காட்டும்‌ குறியீட்டு வடிவம்‌ தான்‌ “தென்முக கடவுள்” (தக்‌ஷணாமூர்த்தி) வடிவம்‌. அந்த வடிவமும்‌, அமைப்பும்‌ போதிக்கும்‌ போதனைகள்‌ விரிவானவை. இவைகளில்‌ ஆதிமூல முக்கிய போதனையின்‌ குறியீடு தான்‌ “சின்முத்திரை”.

சின்முத்திரை: ஒளிநெறி பீடத்தின்‌ கொள்கை குறியீடு “சின்முத்திரை”. “சின்‌” என்பது பேரொளி (அருட்பெருஞ்ஜோதி). பேரொளியின்‌ இயக்க இயல்பு பேரறிவு. இதுவே அனைத்திற்கும்‌ ஆதிமூலம்‌. “முத்திரை” என்பதற்கு அடையாளம்‌ என்று பொருள்‌. மூன்று திரைகள்‌ (மறைப்புகள்‌) என்றும்‌ பொருள்‌ கொள்ளலாம்‌. இந்த குறியீடானது அதில்‌ உள்ள பேருண்மைகளை எப்படி வெளிப்படுத்துகின்றன என்பது விரிவானது.

உன்னுள்‌ ஒளி; உணர்ந்து தெளி: இந்த இறைநிலை இயல்பே நம்‌ மனித இயக்கத்தில்‌ ஆதிமூல தூண்டல்‌ மையமாக அமைந்து உள்ளது, என்பதை குறிக்கும்‌ சொல்லே “உன்னுள்‌ ஒளி” என்பது. இந்த தூண்டலை உணர்வினால்‌ பற்றி நின்று, இயங்கி தெளிவு அடைவதே மனித இயக்க அமைப்பின்‌ நோக்கம்‌. இதை உணர்த்தும்‌ சொல்‌ “உணர்ந்து தெளி”.

பரிவு, பணிவு, பகிர்வு: இயற்கை அமைப்பில்‌ எல்லா இயக்கங்களும்‌ மூன்று மையங்களை கொண்டிருக்கின்றன. அவை தூண்டல்‌ நிலை மையம்‌, செயல்நிலை மையம்‌, தொடர்பு நிலை மையம்‌. முதிர்ச்சி பெற்ற மனித இயக்கத்தில்‌ இந்த மூன்று மையங்களும்‌ அருள்‌ தூண்டல்‌, ஆன்ம இயக்கம்‌, சார்பின்‌ தொடர்பு என்ற வடிவில்‌ அமைந்துள்ளது. இந்த மூன்று மையங்களின்‌ தூய்மையையும்‌, செயல்நிலைகளையும்‌ குறிக்கும்‌ சொல்லே “பரிவு, பணிவு, பகிர்வு”.

திருவாட்சி: சின்முத்திரையை சுற்றி அமைந்துள்ள சுடர்விடும்‌ வட்டத்தின்‌ பெயர்‌ “திருவாட்சி". திரு + அட்சி (கண்). அதாவது தூய்மை மிகுந்த கண்ணொளி. இது நம் முன்னோர்கள்‌ மரபு வழியாக பயின்றுவரும்‌ திருவடி ஞானத்தை குறிக்கும்‌ குறியீடு.

ஏழு சுடர்கள்‌: ஏழுவகையான அலைநிலை இயக்கங்களை குறிப்பதே ஏழு சுடர்கள்‌. வட்ட வடிவில்‌ அமைந்துள்ள திருவாட்சியில்‌ உள்ள சுடர்கள்‌ ஏழு. இந்த பிரபஞ்ச பேரியக்கம்‌, அலைநிலை வடிவானது. இந்த அலைநிலை வடிவத்தில்‌ தூண்டல்‌ நிலையாக இருப்பது ஒளி (அறிவு), செயல்நிலையாக இருப்பது ஒலி (இயங்குதல்‌). இவை இரண்டின்‌ கலவைதான்‌ இந்த பிரபஞ்ச அலைநிலை இயக்கம்‌. இந்த அலைநிலை இயக்கமானது அதிநுண்மை முதல்‌ பருமை வரை ஏழு நிலைகளை கொண்டது.

சூரியன்‌: நாம்‌ இந்த பூமியை மையமாக கொண்டு வாழ்கின்றோம்‌. பூமி சூரியனை மையமாக கொண்டு சுழல்கின்றது. சூரிய கதிர்களால்தான்‌ உலக உயிர்கள்‌ வாழ்கின்றது. இந்த சூரிய வழிப்பாட்டை நம்‌ முன்னோர்கள்‌ நீண்ட காலமாக பயின்று வருகின்றார்கள்‌. அதுதான்‌ “காயத்ரி மந்திரம்‌" (சூரிய ஒளிக்கு ஒளியை தருகின்ற பெருஞ்ஜோதியை வணங்குகின்றேன்‌;) இந்த சூரிய ஒளியே இயக்கத்திற்கு வந்த அருட்பெருஞ்ஜோதி.

ஒம்‌: ஒம்‌ என்பது அகரம்‌, உகரம்‌, மகரம்‌ ஆகிய மூன்று ஒலிகளின்‌ கூட்டு இயக்கம்தான்‌ “ஒம்‌”. இந்த மூன்று ஒலிகளும்‌ பிரபஞ்ச ஆதி இயக்கங்களுடைய அலைநிலை ஒலி. தூண்டல்நிலை மைய ஒலி “அ”, செயல்நிலை மைய ஒலி “உ”, தொடர்புநிலை மைய ஒலி “ம்‌” என்பது ஆகும்‌.

ஒளிநெறி பீடம்‌: நம்‌ முன்னோர்கள்‌ மரபு வழியாக பின்பற்றி வந்த ஒளிநெறி மார்க்கத்தை உலகம்‌ உணரும்‌ வகையில்‌ கொண்டு செல்லும்‌ பீடம்‌ “ஒளிநெறி பீடம்‌”.